വക്കീല്‍ കഥകള്‍.

അഭിഭാഷകനായ കെ കെ രമേഷ് തന്റെ ജീവിതപരിസരത്തെ രസകരമായ അനുഭവങ്ങളാണ് കഥകളായി ഈ സമാഹാരത്തില്‍ അവതരിപ്പിക്കുന്നത്. കോടതി വ്യവഹാരം എന്ന രാവണന്‍കോട്ടയില്‍നിന്നു പുറത്തുകടക്കാനാവാത്തവണ്ണം അകപ്പെട്ടുപോകുന്ന മനുഷ്യരെ കരകയറ്റുന്നതും വഴികാട്ടുന്നതും അഭിഭാഷകരാണ്. ഒറ്റയിരുപ്പില്‍ വായിച്ചുപോകാവുന്ന രസകരമായ കഥകളാണ് വക്കീല്‍ കഥകള്‍. ''അത്ഭുതപ്പെടാന്‍ ഒന്നുമില്ല. താങ്കള്‍ ഈ പരിസരത്തെ ബോര്‍ഡുകളെല്ലാം കണ്ടില്ലെ? ഇപ്പോഴും നമ്മള്‍ വിഡ്ഢി ലോകത്താണ് ജീവിക്കുന്നത്. അതൊന്ന് കാണിച്ചു കൊടുക്കുന്നതിനാണ് ഈ ബോര്‍ഡ്. താങ്കള്‍ക്ക് മനസ്സിലായിട്ടുണ്ടാകുമല്ലോ?'' ''തീര്‍ച്ചയായും.'' ''സാര്‍, കോടതി കഴിഞ്ഞോ, ഏത് കോടതിയിലായിരുന്നു കേസ്?'' ''പുതുതായി ചാര്‍ജെടുത്ത മജിസ്‌ട്രേട്ട് അമൃതാ പി നായരുടെ കോടതി.'' തിലോത്തമ ചിരിച്ചുകൊണ്ട് പറഞ്ഞു: ''അവിടെയും വാലുണ്ട്. വാലുള്ളവരൊക്കെ അത് ഒരു മെഡല്‍ പോലെ പ്രദര്‍ശിപ്പിക്കുകയാണ്. അവര്‍ സ്വയം ചെറുതാകുന്നതായി ഓര്‍ക്കുന്നില്ല.'' തിലോത്തമ തിയ്യത്തിയോട് യാത്രപറഞ്ഞു ഓഫീസിന്റെ പടികളിറങ്ങി, ജീപ്പ് സ്റ്റാര്‍ട്ടാക്കി മുന്നോട്ടെടുത്തപ്പോഴേക്കും ഒരു നായ വാലുയര്‍ത്തിപ്പിടിച്ച് ഓടുന്നതായി കണ്ടു.''