കുചേലവൃത്തം

കഥയെഴുത്തിന്റെ മേഖലയില്‍ ഏറെ ശ്രദ്ധേയനായ പി കെ ശ്രീവത്സന്‍ കഥയുടെ മര്‍മ്മമറിയുന്ന ഉത്തമ സഹൃദയത്വം കൊണ്ട് എന്നെ വിസ്മയിപ്പിച്ചിട്ടുണ്ട്. കുചേലവൃത്തം എന്ന കഥ നാഗരികവികസനത്തിന് ഇരയാവുന്ന നാട്ടിന്‍ പുറത്തിന്റെ വേവുകളെപ്പറ്റിയാണ്. പുരാണത്തിലെ ഒരു കഥാപാത്രത്തെ ഓര്‍മ്മപ്പെടുത്തിക്കൊണ്ട് ഹൈടെക് കാലത്തിന്റെ വിഹ്വലതകളാണ് ഈ കഥ വെളിപ്പെടുത്തുന്നത്. 'പഴയ വാസസ്ഥലങ്ങള്‍' എന്ന കഥ ഉയര്‍ത്തുന്ന സാംസ്‌കാരിക വിമര്‍ശനത്തിന് മുനയും മൂര്‍ച്ചയുമുണ്ട്. നാടിന് നഷ്ടപ്പെടുന്ന മൂല്യങ്ങളെപ്പറ്റിയും നന്മകളെപ്പറ്റിയുമുള്ള വ്യഥകളാണ് ഈ കഥ പങ്കിടുന്നത്. വൈകാരികമായ ഒരു വഞ്ചനയുടെ കഥയാണ് 'പ്രണയം: ചില സാമ്പത്തിക പരിഗണനകള്‍.' ഈ രചനയില്‍ സമകാലിക കേരളീയാവസ്ഥയുടെ തെളിമയാര്‍ന്ന രേഖാചിത്രം തെളിയുന്നുണ്ട്. ഗ്രാമീണതയുടെ പശ്ചാത്തലത്തില്‍, കൃഷിക്കാര്‍ അഭിമുഖീകരിക്കുന്ന പ്രശ്‌നങ്ങളെ അവതരിപ്പിക്കുകയാണ് 'നെല്ല്' എന്ന കഥ. ആശയറ്റ കര്‍ഷകന്റെ ആത്മരോദനങ്ങളാണ് ഈ കഥയില്‍ മുഴങ്ങുന്നത്. പി കെ ശ്രീവത്സന്‍ കഥയുടെ വിനയാന്വിതനായ ഒരു ഉപാസകനാണ്. അദ്ദേഹത്തില്‍നിന്നും പിറവിയെടുത്ത ഈ പുസ്തകം മലയാള കഥയുടെ വര്‍ത്തമാനത്തെ ചലനാത്മകമാക്കുന്നുണ്ട്. വൈശാഖന്‍